№37 мектеп-гимназиясы базасында өткізілген ашық сабақ туралы

Қаламыздағы №37 мектеп-гимназиясында әдебиетті оқытудың өрісі кең, өзгеше жүйесін қалыптастырып жүрген шын мағынасындағы ұстаз, санаулы тұлғаларымыздың бірі- Қазақстанның еңбек сіңірген мұғалімі, КСРО Мемлекеттік сыйлығының лауреаты , Қазақстан Республикасы педагогика ғылымдары академиясының академигі Бітібаева Қанипа Омарғалиқызы атындағы ғылыми зертхана жұмыс жасайды. Зертхана меңгерушісі Жакенова Құралай Құралтайқызының жетекшілігімен облыс, қала мектептері арасында өзара іс-тәжірибе алмасу мақсатында №37мектеп-гимназия базасында сыныптан тыс іс-шаралар мен ашық сабақтар өткізіліп тұрады.

2017 жылдың 28 қарашасында «№41жалпы орта білім беретін мектеп» КММ қазақ тілі мен әдебиеті пәні мұғалімі Бақытгүл Кадырханқызы Амирова 8 «Б» сынып оқушыларымен қазақ әдебиеті пәнінен Қанипа Бітібаеваның «Ой тастау, ойланту, ойлау» технологиясын қолданып, Абай Құнанбайұлының «Өлең –сөздің патшасы, сөз сарасы» өлеңі бойынша ашық сабақ берді. Сабақ барысында оқушылардың өз бетімен ізденуіне, пікір еркіндігіне, зерттеу жұмысына баса назар аударылды. Алдын ала берілген зерттеушілік жұмысы арқылы оқушылар Абай Құнанбайұлының өмірі мен шығармашылығынан мәлімет берді. «Абай Құнанбайұлы» бейнетаспасы көрсетіліп, «Өлең - сөздің патшасы, сөз сарасы» өлеңі аудиокітаптан тыңдалды. «Білімдіден шыққан сөз,талаптыға болсын кез...» тапсырмасы арқылы оқушылар ұяшықтардағы сұрақтарға жауап берді. «Ой ойдан шығады...» тақырыбында оқушылар топтық жұмыс тапсырмасын белсенділікпен орындап, өз ойларын толық жеткізе білді. Сабақты қорытындылау мақсатында «Авторға хат» әдісі арқылы шығармашылық жұмыс жасалды. Сабақтың өн бойында, әр кезеңдерінде «ой тастауда» белгіленген ауқымды мақсатқа жетудің жолдары жүйелі түрде ойландыру, ойлау іс-әрекеттері арқылы жүзеге асты. Мұндай іс-шаралар оқушының, ұстаздың өзін-өзі дамытуына жағдай жасап, білім беруді жан-жақты жүзеге асыруға септігін тигізері сөзсіз.