«Соңғы қоңырау» салтанатты жиыны туралы ақпарат
2022 жылғы 25 мамырда сағат 10.00-да «№41 жалпы білім беретін орта мектебі» КММ-да «Соңғы қоңырау» салтанатты жиыны өтті. Салтанатты жиынға ұстаздар, ата-аналар, қонақтар және мектеп оқушылары қатысты.
Әр мектепте бұл күн- мектеп тарихына енетін ерекше оқиға.
11- сынып оқушылары өздерінің он бір жыл білім алған алтын ұяларымен қоштасады.
Салтанатты жиын мемлекеттік Әнұранмен басталды. Мектеп директоры А.Т.Тукенова 2021-2022 оқу жылында мектеп ұжымы қол жеткізген табыстарды атап өтіп, мерекемен құттықтады, түлектерге ақ жол тіледі. Құрметті қонақ ретінде Шәкәрім университетінің профессоры, «Тамақ өндірісінің технологиясы және биотехнология» кафедрасы тарих ғылымдарының докторы К.Ж.Амирханов қатысты, барша ұжымды мерекемен құттықтап, «Алтын белгіге» үміткер түлектерге университет құттықтауын жеткізді. Салтанатты жиын барысында оқу озаттары, 2021-2022 оқу жылында пәндік олимпиадалар, ғылыми жобалар, түрлі интеллектуалдық конкурстарда, спорттық сайыстарда жеңімпаз атанған мектеп оқушылары Мақтау қағаздарымен марапатталды.
Осындай мектеп ұжымының табысты жолы алдағы уақытта жалғасатынына мектеп әкімшілігі зор сенім білдірді. Келесі кезекте құттықтау сөз түлектерге берілді. Биылғы оқу жылында мектепті 24 оқушы аяқтап, үлкен өмір жолына қадам басып отыр. Мектеп бітіруші түлектер ән шырқап, мектеп вальсін биледі.
Барша жас түлектердің мемлекеттік емтихандар мен ҰБТ-ны сәтті тапсыруларына мектеп ұжымы тілектестік білдірді.
11 жыл бойы мектеппен бірлесе жұмыс жасап, үнемі көмек қолын созып , қолдау көрсетіп жүрген ата-аналар атынан М.Бекқожина , Е.Ю. Салюкова мектеп ұжымын және түлектерді Соңғы қоңырау салтанатымен құттықтады. Мектеп директорының оқу ісі жөніндегі орынбасары С.Р.Балданбаева сөз алды, оқу жылының аяқталуы, 9, 11-сынып оқушыларын қорытынды аттестаттауға жіберуге байланысты бұйрықты оқыды. Жиын соңында мемлекеттік Әнұран шырқалып, мектеп бітіруші түлектер соңғы сынып сағатына шақырылды. 